’n Gemeente vol dankbaarheid
Onder die koeltebome is die lewe lekker: Vliegpoort se lidmate ontspan en kuier tydens die gemeente se jaarlikse dankie-sê-dag.
Platinum Bushvelder koerant | Thabazimbi – Met uitrustings uit alle wêrelddele en selfs ’n kuiergas wat soos Donald Trump gelyk het, het die Vliegpoort-gemeente op Sondag 25 Oktober 2026 hul jaarlikse kuierdag behoorlik laat kleur kry.
Die dag was ’n dankie-sê aan lidmate vir hul skenkings en harde werk tydens die jaarlikse Apiesdoring-karnaval. Dié keer kon die helpers self agteroor sit en die bederf geniet.
Die tema, “Besoekers uit verskillende lande en kulture”, het vir kreatiewe uitrustings en hope vermaak gesorg. Groot was die pret toe “Donald Trump” se ware identiteit onthul is: niemand anders nie as ds. Hennie van der Linde!
Onder die koeltebome het lidmate heerlik ontspan, gelag en gekuier. Met smaaklike kos en goeie geselskap was daar oorgenoeg rede om ’n rukkie langer te vertoef. Melissa Linde en ds. Hennie van der Linde bedank die kerk se jagspan hartlik vir die heerlike kos wat die dag ekstra spesiaal gemaak het. Die boodskap ná dié gesellige dankie-sê was eenvoudig: “Volgende jaar maak ons weer so!”
